9tv : المهدي حنابي
وزيرة السياحة عوض تجيب شباب دارو مشاريع ونجحو فيها جايبة شباب روتيني اليومي بحال الى كتقول للمغاربة راه المشروع الناجح الوحيد حاليا للشباب هو كاميرة وصور فيديوات تيك توك ويوتوب وانستغرام
على ما يبدو فإن برنامج فرصة لي دارتو الدولة باش تدعم الشباب رداتو وزيرة السياحة فرصة لصحاب يوتوب وإنستنغرام باش يبدرو على راسهم في فلوس باردة بلا ماينتجو تاحاجة من غير القرنابي، وعوض تكون إنطلاقة البرنامج عبر تشجيع مشاريع لشباب يدورو بيها الحركة وتخلق مناصب شغل، وزيرة السياحة فرقات النهار اللول 23 مليون درهم غير لمواكبة البرنامج وباش هاد المواكبة بصحاب يوتوب وانستغرام ودير جيم وأبوني باش يصولك الجديد، شاب مغربي خارج من أزمة كورونا حي غير بزز، خاصو يتعصر ويفكر ويجيب مشروع مقاد وواضح باش يشد عشرة دالمليون بلا فائدة، حقا راها رقم يقدر يبدى بيه الواحد مشروع ويكبرو الى خدم وتابر وتكرفص وميأسش ولكن ملي غادي يشوف بلي صحاب دير جيم وأبوني شدوها باردة غير باش يروجوا للبرنامج ويديرو مواكبة واش ماشسي الشمتة والفقصة هادي، واحد غاديس يضرب تمارة باش يشد عشرة دالمليون كريدي يدير بيها مشروع، وواحد غير غادي يخبرو بهادشي تخسر عليه كثر منها وفي أفخم لوطيلات في المغرب.
في عز الأزمة والشعب والشباب كيعانيو من الغلاء والبطالة والتبعات الاقتصادية لسنوات ديال كورونا، وكولشي مزير السمطة وغير كيشوف إلا المنتخبين والمسؤولين ها لي باغا تبني جامع قد ولاد جامع ها لي مخرج أسطور ديال آخر مكاين في الطوموبيلات، مدراء الإدارات ديال الدولة مخرجين حديد جديد، وزيرة ديال السياحة زعمة بعقلها جامعة عليها الجقلة وخاسرة الزبابل ديال الفلوس باش تدير المواكبة لبرنامج شبيه بالإنعاش الوطني الأنشطة ديال المواكبة ديالوكتدار في سوفيتيل، واش هاد الناس منفاصلين على الواقع أو نرجسيين لدرجة أنهم يشوفوا البلاد والعباد مكرفصين وغادين للحيط ولكن هوما ميهتموش ويكملوا عملية التبذير الممنهجة ديال فلوس الدولة لي كتدار سنوات هادي والا من رقيب أو حسيب.
وحتى ملي كيبغيو بحال هاد الوزيرة يستاعنوا بالمؤثرين من أجل الإشهار أو التوعية كيمشيو لواحد النوع معين ممأثرش حتى في راسو وكيخليو المؤثرين الحقيين لي عندهم متابعين بالملايين ولي عندهم أثر وكلمة في أرض الواقع بحال صوفيا طالوني لي قريب يعينها أردوغان مندوبة ديال السياحة الطبية، أو مي نعيمة عندها مشاهدات بمئات الملايين وعندها ناس متبعينها ومتبعين عائلتها ودوارها ونسابها وتريكتها كلها، ومن غير هادو راه تجمع دوك المؤثرين لي جابتهم الوزيرة في كفة مايعطيوكش حتى حلقة ديال الخراز بحكمها والفائدة ديالها والأثر ديالها على الناس ونسبة المتابعة، الخراز كيضل يعاود ويهدر وينصح وينور ويسوق لأفكار ويدافع ويعرف،وعندو معجبين ومتابعين وأتباع كثار وعندو كلمة وقيمة، أما وزيرة مشرفة على برنامج للنهوض بالشباب زعمة عوض تجيب شباب دارو مشاريع ونجحو فيها جايبة شباب روتيني اليومي هوما البدية، بحال الى كتقول للمغاربة راه المشروع الناجح الوحيد حاليا للشباب هو كاميرة وصور فيديوات تيك توك ويوتوب وانستغرام.
